මෝහිණී රැවටූ ටිං ටිං ගුරුන්නාන්සේ

මධ්‍යම රාත‍්‍රිය එළඹෙද්දී මිතුරෝ සිව්දෙනා මත්පැන් බෝතල දෙකක් හිස් කොට තිබිණ. දැන් කාගෙත් කතාව විසිර යන්නටය. ඔන්න ලාල් දැන් යනකොට උඹ පරිස්සං වෙයන්. මේ වෙලාවෙ උඹ යන පාරෙ තමයි මෝහිණී ඉන්නේ. එක් මිතුරෙක් ලාල් හාමුට උපදෙස් දුන්නේය. ලාල් හාමු කැටවල හාමුගේ බාල පුත‍්‍රයාය. ඔය මෝහිණී දරුවා දෙනකොට ඒකිගෙ ඇස් දෙක දිහා බැලූවොත් දරුව ගන්න හිතෙනවා. එහෙම ගත්තොත් එවෙලෙම මේකි බෙල්ල මිරිකල මරල දානවය කියන්නෙ.
බේරෙන්නෙත් එහෙමම කෙනෙක්ලූ.. අනෙක් මිතුරා කීවේය. සුදු පාට සාරියක් ඇඳගෙන එන මේකි හරිම ලස්සනයිලූනේ බං... අනෙක් මිතුරා කිවේය. ‘‘මං ඕවට බය නෑ.. කිවූ ලාල් හාමු ආපසු යන්නට නැගිට්ටේය. ‘‘හොඳයි පරිස්සමට යන්න හාමු.. මිතුරෝ තිදෙනා අනෙක් පැත්තට ගියහ. ලාල් හාමු දැඩි ලෙස මත්පැන් පානයට ඇබ්බැහි වූ අයෙකි. ඔහුගේ විවාහය ද දෙදරා ගියේ මේ හේතුවෙනි.

 ලාල් හාමු මං කාටවත් බය නෑ කියමින් හිතට ධෛර්යය ගත්තත් හිවලූන්ගේ හා බස්සන්ගේ කෑ ගැසීම, පරිසරයේ නිසංසල බව හා අටවක සඳ එළිය ඔහුගේ හිතට මහත් චකිතයක් ඇති කළේය. පාර දිගේ නොගොස් පොල්වත්ත හරහා යන්නට ඔහු තීරණය කළේ මෝහිණී ඇත්තේ එම පාරේය යන කතාවක් මිතුරන් කිවූ හෙයිනි. පොල්වත්ත මැදින් යද්දී එක් වරම සුදු පැහැති සාරි පොටක් ලාල් හාමුගේ කරට උඩින් වැටිණ. ඉතා බියට පත් ඔහු පසු නොබලාම දිව ගියත් පය පැකිලී වැටිණ. වහා නැගිටගත් ඔහුට මෝහිණීිය තමා වෙත එන අඩි සද්දයත් ඇය දැන් තමාගේ කකුල් දෙක අසල සිටින බවත් දැනුණ නිසා ඔහු තදින් ඇස් පියා ගත්තේ වැරදිමකින් හෝ ඇගේ නෙතට නෙත ගැටුණහොත් මිතුරන් කී පරිදි වැඬේ හමාර වන නිසාය. ඉතා තදින් මත් වී සිටින ඔහුට මෝහිණී දරුවා වඩා ගැනීමට අණ කරන බව ඇසිණ. මෝහිණී තම ගෙල සිර කිරීමට සැරසෙන බව දැනුණ නිසා ඔහු කෑ ගැසුවේය.

 තම පුතු තවමත් ගෙදර නොආ නිසා මිදුලේ සිට පාර දිහා බලා සිටි කැටවල හාමුට පොල්වත්ත දෙසින් තම බාල පුතා කෑ ගසනු ඇසිණ. කලබලයට පත් කැටවල හාමු කළුවරේම ඒ දෙසට දිව ගියේ විදුලි පන්දමක් හා පාවහන් යුගලයක් ද නොමැතිවය. බිම වැටී සිටි ලාල් හාමු දුටු කැටවල හාමුගේ මුවින් ‘හත්දෙයියනේ. යනුවෙන් කියවිණ. හැට විය ඉක්මවූ කැටවල හාමු තම පුතා කර මතට ගත්තේ යෝධ කාය ශක්තිය ඇති තිස් වියැති තරුණයෙකු මෙනි. වලව්වේ සෝපාව මත සැතප්පෙවූ ලාල් හාමු දිගටම කිවුවේ ‘මෝහිණී මෝහිණීීීී. යන්න පමණි. සර්ප වෙද මහතා වහා ගෙන්වූ කැටවල හාමු සර්පයෙකු දෂ්ට කොට නැති බැව් සැක හැර දැන ගත්තේය. රාත‍්‍රියේම කැඳවාගෙන ආ ටිං ටිං ගුරුන්නාන්සේ ලාල් හාමුට මෝහිණීයගේ බැල්ම වැටී ඇති බවත් පසු දිනම තොවිලයක් කළ යුතු බවත් එතෙක් ආරක්‍ෂා නූලක් දමන බවත් කීවේය.

 පසු දින කැටවල වලව්වේ තොවිලයකට අවශ්‍ය කටයුතු සම්පාදනය විය. නිවස ඉදිරිපිට එළිමහනේ පාන් පැලවල් ගොක් සැරසිලි ඉදිවිය. පැත්තක පොල්කටු 200 ක පමණ ගොඩක් ද තෙත පිදුරු ද ගොඩ ගැස්සවීය. මිදුල කෙළවරක කුඩා පොල් අතු පැලක් ඉදිිවිය. ඉන් එළියේ පැත්තකට වන්නට දැමූ පන් පැදුරක ආතුරයා ඉඳ ගත්තේය. ඔහු දෙපසින් කැටවල හාමු හා බිරිඳ ඉඳගත්හ. තොවිලයේ කටයුතු සඳහා ගෝලයා සහ තවත් දෙදෙනෙක් ආහ. ඉන් එක් තරුණයෙකුට කතා කළ නොහැක. ඔහු කොණ්ඩය වවා පිටුපසට වන්නට දමා ඇති අතර අත් දිග මේස් බැනියමක් හැඳ එයට පිටින් ජැකට්ටුවක් ඇඳ සිටියේය. ඔහු දක්‍ෂ බෙරකරුවෙකි. අනෙක් තරුණයා නැට්ටුවෙකි.

 රාත‍්‍රි 10 ට තොවිලය ඇරඹිණ. තොවිල් කවි ගායනා බෙරහඬ දුම්මලකිිරි විලක්කු මධ්‍යයේ රාත‍්‍රි 12.00 පමණ තෙක් එක දිගට තොවිලය කෙරිණ. අටවක සඳ බැස ගියතැන ඝන අඳුර පැතිරිණ. පොල් කටු 200 ක් පමණ අතු පැල ඉදිරියේ ගිනි දල්්වා ඒවා අඟුරු වූ පසු ඒ මතට තෙත පිදුරු දමන ලෙස ටිං ටිං ගුරුන්නාන්සේ අණ කළේය. සුදු පාට ඝන දුමාරයක් ඉන් නිකුත් වන්නට පටන් ගත්තේය. අතු පැල ඉදිරියෙන් කිසිවෙකුටත් නොයන ලෙස කී ගුරුන්නාන්සේ ඒ දෙසින් දැන් මෝහිණීීීීිය පැමිණෙන බවත් සුදු පාට දුමාරය දෙස හැමෝටම බලා සිටින ලෙසත් කීවේය. සියලූ පන්දම් නිවා දැමිණ. වටපිටාවේ දැඩි අඳුර පැතිර ඇත. ගොළු ගෝලයා බෙර ගසමින් ඈතට ගමන් කළ අතර බෙර හඬ නතර වනවාත් සමගම මෝහිණී පැමිණෙනු ඇතැයි ගුරුන්නාන්සේ කීවේය.

 බෙර හඬ නතර විය. ඈතින් ගැහැනු කෙනෙකුගේ විලාපයක් ඇසිණ. ‘‘මගේ දරුවා දීපල්ලා.. විලාපය ටික ටික ළං විය. සියලූම දෙනා බියෙන් ගැහෙන්නට විය. දුමාරය මැද්දෙන් තරුණ ස්ත‍්‍රියක් ඉතා කුඩාවට පෙනිණ. ක‍්‍රමයෙන් ඒ රුව විශාල වී අඩි දහයක් තරම් උස් විය. ‘‘මගේ දරුවා දීපං.. ඇය මහ හඬින් කෑ ගැසීය. ‘‘හරි දරුව දෙන්නං ඊට කලිං මේ ආතුරයගෙ ඇඟට වහපු මෝහිණී දිෂ්ටිය අයින් කොරපන්.. ටිං ටිං ගුරුන්නාන්සේ ඉතා රළු හඬින් කීවේය. ‘‘හරි ඔන්න මං අයින් කොරා දැං මගෙ දරුව දියං.. කියූ මෝහිණීය අතුරුදන් විය. ‘‘ලාල් හාමු දැන් සනීපයි නේද?.. ගුරුන්නාන්සේ ලාල් හාමුට පවන් සලමින් ඇසුවේය. ඔහුගේ මුවඟට සිනහවක් නැගිණ. ‘‘දැන් සනීපයි ගුරුන්නාන්සේ.. ඔහු ඉතා සතුටින් කීවේය. හරි දැන් යස්සනීට අපේ පොරොන්දුව ඉෂ්ට කරමු යැයි ළමයෙකුගේ ප‍්‍රමාණ බෝනික්කෙකු ලාල් හාමුගේ අතට දුන් ටිං ටිං ගුරුන්නාන්සේ ‘‘දැන් ලාල් හාමු මං ආපහු මෝහිණීීීීීව ගෙන්නුවම ඔය බෝනික්කා ඒකී ඉන්න තැනට විසි කරන්න. ඒකි බිම වැටෙන්න නොදී බෝනික්කව අල්ලා ගෙන පණපිහිටුවල අරං යයි. එතකොට ගනුදෙනුත් ඉවරයි ප‍්‍රශ්නෙත් ඉවරයි.. ටි ටිං ගුරුන්නාන්සේ මෝහිණීීීට යළිත් ආරාධනා කරමින් මතුරන්න විය. නැවතත් ඇය දුමාරය අස්සෙන් මතුවිය. ‘‘ආ උඹේ දරුව ඔන්න අල්ල ගනිං හැබැයි මීට පස්සෙ ආයෙ මේ පැත්ත පළාතෙ එනව නොවෙයි. එහෙම ආවොත් උඹල දෙන්නම අතුරුදන් කරනව.. ගුරුන්නාන්සේ තර්ජනාත්මකව කීවේය. ලාල් හාමු ඉක්මනට දරුව දෙන්න.. ගුරුන්නාන්සේ කලබලයෙන් කීවේය. ලාල් හාමු මෝහිණී දෙසට බෝනික්කා විසි කළ අතර ඉන් පසු සිහින් දරු නැළවිලි ගීයක් ඒ දෙසින් ළයාන්විත ස්ත‍්‍රී කටහඬින් ඇසිණ. සියලූදෙනා නිහඬව එම ගීයට සවන් දුන්හ.

 ‘‘මගේ පුතා කොතැන ගියේ
 මා තනිකර යන්න ගියේ
 පුතා මගේ පණ සරියේ
 තනි නොකරමි නුඹ ආයේ..

 ‘‘යකින්නියක් වුණත් තමන්ගේ දරුවට තිබෙන සෙනෙහස.. කියා කියූ කැටවල හාමුගේ දෙනෙතින් කඳුළු බිඳු හැලෙන්නට විය. ටිං ටිං ගුරුන්නාන්සේගේ අවවාද ඉතා ඉහළින් පිළිගත් ලාල් හාමු රහමෙර පානයෙන් සහමුලින් ම අත්මිදුණේය. පසුව ඔහුගේ හැරගිය විවාහක බිරිඳ හා දරුවා ගෙන්වා ගෙන හොඳින් කල් ගෙවීය. මුණුබුරා නිසා කැටවල සීයාට දැනුණේ් අප‍්‍රමාණ සතුටකි.

 මැග්නීසියම් පටියක් දැල්වීමේදී ඉතා දීප්තිමත් ආලෝකයක් ලැබේ. අඩියේ අඩියේ පමණ ලී රාමුවක එක පැත්තක සාරියක් ඇඳගත් කාන්තාවකගේ රූපය කපා ඉවත් කර කාඞ්බෝඞ් තහඩුවක් අලවා ඇත. එයට විරුද්ධ පසින් මැග්නීසියම් කැබැල්ලක් දැල්වූ විට එම ආලෝකය ගැහැනු රූපය කපා ඉවත් කළ සිදුරෙන් එළියට ගොස් තෙත පිදුරු හා පොල්කටු අඟුරුවලින් ඇති කරන්නා වූ ජල වාෂ්ප දුමාරය මත රූපයක් මවයි. දැල්වෙන මැග්නීසියම් කැබැල්ල කාඞ්බෝඞ් සිදුර වෙත ඈත් මෑත් කිරීමෙන් ගැහැනු රූපය කුඩා හෝ විශාල කළ හැක. මීට දශක තුනකට පමණ පෙර ඡායාරූප ගැනීමේදී අවශ්‍ය වන අති දීප්ත ආලෝකය (Flash Light) ලබා ගැනීම සඳහා මැග්නීසියම් කෙඳි පිරවූ බල්බයක් විදුලි බලයෙන් දහනය කරනු ලැබීය.

 ගොළු තරුණයකු ලෙස පෙනී සිටි බෙර වයන්නා තරුණයකු නොව තරුණියකි. මේ කටයුත්ත සඳහා අවශ්‍ය සියුමැලි ගැහැනු කටහඬ රහසිගතව ඇය විසින් ලබා දෙන ලදී. වලිගය ලෙස සුදු සාරි පොටක් යෙදූ සරුංගලයක් නූලේ ග‍්‍රහණයෙන් වෙන් වී ගසක පැටලී තිබිණ. සුළඟට එය ලාල් හාමුගේ කර මතට වැටීම නිසා ඔහු තදබල මානසික කම්පනයකට පත් වී රෝගාතුර විය. පැහැදිලි ලෙස ටිං ටිං ගුරුන්නාන්සේ ඒත්තු ගැන්වූ කරුණු නිසා ඔහුගේ මනස යථා තත්ත්වයට පත්විය. රැවටීමකින් හෝ ඒ යුගයේ ජනතාවට සහනයක් දුන් මෙවැනි කාරණා ගැරහීමකට පත් කළ යුතු නොවේ.


 චිත‍්‍රාන් මොරකන්දෙ ගමගේ

7 comments:

Powered by Blogger.